කොල්ලන්ට ෆැෂන් Tips

සුදු වෙන්නෙ කොහොමද?

2012-02-09T01:17:00.003+05:30

මං මේ ලියන සමහර දේවල් කොල්ලන්ට නෙමේ කෙල්ලන්ටත් වටීවි. ඔන්න කියන්න යන්නේ සුදු වෙන හැටි. මුලින්ම කියන්න ඕනි සුදු වෙනව කියන්නෙ ලස්සන වෙනවා කියන එකම නෙමේ. තලෙලු ඒත් ලස්සන අය ඉන්නව ඕනි තරං. තමංගෙ හම පැහැපත් නං (ලප කැලැල් අවමයි නම්) අන්න ඒකයි ලස්සනයි කියන්නෙ.

සුදු වෙන හැටි...
පළවෙනි ‍දේ.. ඉර එළියෙන් හැකිතරම් ඉවත්ව සිටින්න. අධික හිරු එළිය නිසා ඔබේ සමේ පැහැය අවපැහැගැන්වෙනවා. එළියට යනවා නම් සන් ‍බ්ලොක් (Sunblock) එකක් පාවිචිචි කරන්න. සන්බ්ලොක් වර්ග ඕනි තරං තියනව වෙළඳපලේ ගන්න. සමහර සන්බ්ලොක් වර්ග මුහුණට වෙනම සහ අත් සහ පාද වලට වෙනම තියනව.

සන්බ්ලොක් එකක් ගන්නකොට බලන්න ඕනි ඒවයෙ මුද්‍රණය කරල තියන SPF (Sun protection factor) අගය. අගය වැඩි වෙන තරමටම හිරු එළියෙන් සම ආරක්ෂා වීමත් වැඩියි. සාමාන්‍යයන් SPF අගය 30ක් පමණ වෙන සන්බ්ලොක් එකක් ලංකාවෙ ඉන්න අපට වඩාත් හොඳයි.

ඕක තමා සුදු වෙන්න පුළුවං ලේසිම ක්‍රමේ. ඊට අමතරව ගෙදර ඉඳන් කරන්න පුළුවං ගොඩ වෙදකම් ටිකකුත් කියන්නං. හැබැයි මේ දේවල් කරනවනම්, හිරු එලියට නිරාවරනය වෙනව නම් අනිවාර්යෙන් සන්බ්ලොක් එකක් පාවිච්චි කරන්න. ‍ ගෙදර ඉන්නවනම් අඩුම ගානෙ මොයිස්චරයිසර් එකක් පාවිච්චි කරන්න. මොකද දැං කියන්න යන දේවල් වලදි සමේ උඩින් තියන මැරුනු සම අයින් වෙලා යට තියන අළුත් සම නිරාවරණය වෙනවා. මොයිස්චරයිසර් එකක් පාවිච්චි කලේ නැත්තං හම රැලි ‍වැටෙන්නත්, සන්බ්ලොක් එකක් පාවිච්චි කලේ නැත්තං තිබ්බටත් වඩා අවපැහැගැන්වෙන්නත් ඉඩ තියනව.

ගෙදර සිට සත්කාර..
ලෙමන් හෝ දෙහි බෑයක් මූනේ අතුල්ලන්න. විනාඩි 15-20ක් තියල හෝදල දාන්න. දෙහි වල තියන ආම්ලක තාවය නිසා මුහුනේ තියන පැල්ලම් අඩු වේවි. කැමති නම් ලෙමන් සමඟ මී පැණි පාවිච්චි කරන්නත් පුළුවන්.

අල ගෙඩියක් බ්ලෙන්ඩරේ දාල චප්ප කරල ඒකෙ යුෂ අරං මූනේ ගාන්න. විනාඩි 15-20ක් තියල හෝදල දාන්න. තක්කාලි, ඉදුනු කෙසෙල්, තක්කාලි, ග්‍රීන් ටී උනත් මේ විදියට පාවිච්චි කරන්න පුළුවන්.

තවත් සමහරු මී කිරි හෝ යෝගට් පාවිච්චි කරනව. මේකත් හොඳ ක්‍රමයක් සුදු වෙන්න. මීට අමතරව සතියකට විතර වතාවක් ස්ක්‍රබ් එකක් කරන්න පුළුවං නං සමේ උඩින් තියන මැරුනු සම අයින් වෙලා යට තියන අළුත් සම නිරාවරණය කරගන්න පුළුවන් .. එත් මතක ඇතුව මොයිස්චරයිසර් හෝ සන්බ්ලොක් එකක් පාවිච්චි කරන්න.

අවසාන වශයෙන්, සුදු වෙනඑක එක දවසින් වෙන්නෙ නෑ. ඒකට මාස කීපයක් යනව. :) තවත් පෝස්ට් එකකින් හමුවෙමු.

අවුරුදු දෙකකට පස්සෙ...

2012-02-09T00:25:00.003+05:30

අවුරුදු දෙකකට විතර පස්සෙ මට බ්ලොග් එකක් කියල එකක් තිබුන නේද කියල මතක් වුනා. :D ලොග්‍ වෙන්න පාස් වර්ඩ් එකත් මතක නැතුව තිබ්බෙ කොහෝම හරි රිසෙට් කරල ඒකත් හදාගත්ත. අවුරුදු එකහමාරක් විදේශගතවෙලා හිටිය අතරෙ අධ්‍යාපනික කටයුතු සහ රාජකාරී කටයුතු නිසා කොහෙත්ම වෙලාවක් තිබුනෙ නෑ බ්ලොග් ලියන්න. ඒත් දැං නං මං හිතන්නෙ වෙලාවක් ලැබේවි. බලමු.

මේ අතර එක්තරා වෙබ් ෆෝරම් එකක මං ලියපු පෝස්ට් එහෙම පිටිං කොපි කරල යම් කිසි කෙනෙක් තමං ලියපු දේවල් විදියට දාල තියනව කියල යාළුවෙක් ලින්ක් එකක් එ‍වල තිබ්බ. මගෙ පෝස්ට් කොපි කරල දැම්මට කමක් නෑ :) හැබැයි අඩුම ගානෙ කොපි කලේ කොහෙන්ද කියල කියනව නං ඒක ඒ කෙනාගෙන් සිදුවිය යුතු යුතුකමක්.

එහෙනං ඉක්මනින්ම පෝස්ට් එකක් දාන්නං..දැං සිංහලෙන් ටයිප් කරන්නත් අමාරුයි වගේ. :/

ඇඳුම් සඳහා වර්ණ ගැලපීම

2010-05-19T22:12:00.001+05:30

ඇඳුම් අඳිනකොට වර්ණ ගැලපීම ඉතාමත් වැදගත්. මොනතරම් වටින ඇඳුමක් උනත් ඒ සමඟ යොදන අනෙක් ඇඳුමේ වර්ණය සමඟ ගැ‍ලපෙන්නෙ නැත්නම් ඒ ඇඳුම ඇඳීමෙන් වැඩක් නෑ.

වර්ණ ගැලපීමේදී හොඳ අවබෝධයක් ලබාගන්න පුළුවන් කලර් වීල් (Color wheel) එකෙන්. උදාහරණයක් විදියට ‍රෝස පාට ටී ෂර්ට් එකකට ලා කොළ පාට කලිසමක් කොහෙත්ම ගැලපෙන්නෙ නෑ. Color wheel එකේ යාබද වර්ණ හොඳින් ගැලපෙන අතරෙ විරුද්ධ වර්ණ නිවැරදිව භාවිතා කලොත් ගලපගන්න පුළුවන්. ප්‍රධාන දේ මේකයි. වර්ණ ගලපන අතරෙ එම වර්ණ වලම ලා සහ තද වර්ණ අතර වෙනසක් පෙන්වන්න උත්සාහ කරන්න. උදාහරණයක් විදියට තද නිල් ඩෙනිම් කලිසමක් සහ කහ පාට ටී ෂර්ට් එකක්.

තවත් දෙයක් සාමාන්‍යයෙන් කළු, සුදු සහ අළු පාට වෙනත් ඕනෑම වර්ණයක් සමඟ ගැලපෙනවා. මේවා හඳුන්වන්නේ neutral colors ලෙස. ඔබේ ඇඳුමේ මූලික කොටස් මේ neutral colors වලට අයත් නම් දීප්තිමත් වර්ණයක් තෝරාගන්න ඔබට හැකියාව තියනවා. උදාහරණයක් විදියට කළු කබායක් සහ කලිසමකට සුදු කමිසයක් සහ රතු ටයි පටියක් ගැලපෙනවා.

මී ළඟට ඔබේ සමේ වර්ණය වැදගත්. ඔබේ සමේ වර්ණය අඳුරු නම් ලා පැහැති දීප්තිමත් වර්ණයක් තෝරාගැනීම වඩාත් සුදුසුයි. ඔබ ගොඩක් සුදුයි නම් ඉතාමත් අඳුරු වර්ණ වලට නොයා ලා පැහැති සහ මඳක් තද පැහැති වර්ණ තෝරා ගැනීම සුදුසුයි. සාමාන්‍යයෙන් සුදු කමිස හෝ ටී ෂර්ට් ඕනෑම වර්ණයක් සමඟ හොඳින් ගැලපෙනවා.

කලිසම් තෝරන විට ඉතාත්ම වර්ණවත් කලිසම් තේරීමෙන් වලකින්න. ඇඳුමක ඇස යායුත්තේ කලිසමට නෙමේ. කලිසම් සඳහා neutral colors හෝ තද නිල්, කාකි වැනි අඳුරු පැහැයට බර වර්ණ පමණක් තෝරාගන්න නිතරම උත්සාහ කරන්න.

ඒ වගේම දේශගුනය අනුව වර්ණ තෝරාගැනීමත් වැදගත්. දවසේ උෂ්නත්වය ඉතාමත් අධික නම් සුදු හෝ ලා වර්ණ ඇඟලා සිටීම ඔබේ දෛනික වැඩකටයුතු වලදී වඩාත් පහසුවක් වේවි.

වර්ණ වලට අමතරව රටා එකිනෙක ගැලපීමත් වැදගත් . මේ ගැන පස්සෙ දවසක කතා කරමු.

කොන්ඩෙ පිළිවෙලට තියාගන්න

2010-05-02T10:17:00.002+05:30

මා‍සෙකටත් වඩා කාලයක් සද්ද නැතුව ඉඳල අන්තිමේදි පෝස්ට් එකක් දාන්න වෙලාවක් ආව. අප්‍රේල් මාසෙ අළුත් අවුරුදු නිසා වැඩ වැඩි වෙලා තිබුනෙ. :(

මේ පාර ලිපියෙන් මම කතාකරන්න යන්නෙ කොන්ඩෙ පිළිවෙලට තියාගන්න පාවිච්චි කරන දේවල් ගැන. කෙනෙකුගෙ පෞරුෂය පෙනෙන හොඳම සාධකයක් ඒ කෙනාගෙ කොන්ඩෙ. මීට කලින් ලිපියක හෙයා ස්ටයිල් ගැන මම ලිපියක් ලිව්ව මතක ඇතිනෙ. කොන්ඩෙට කොච්චර ස්ටයිල් දැම්මත් වැඩක් නෑ ඒක හරියට පිළිවෙලකට කලේ නැත්නම් තේරුමක් නෑ.

කොන්ඩෙ පිළිවෙලට තියාගන්න ගොඩක් දෙනා ගොඩක් දේවල් භාවිතා කරනව. මේ අතර ඉතාම ප්‍රසිද්ධ ඒ ව‍ගේම බහුලව භාවිතා වෙන දෙයක් හෙයා ජෙල් (Hair Gel). රුපියල් 5 සැෂේ පැකට්ටු වල ඉඳන් රුපියල් 6-700 දක්වා හෙයාජෙල් වෙළඳපොලේ තියනව. මීට අවුරු ගානකට කලින් හෙයාක්‍රීම් බහුලව භාවිතා වුනත් දැන් ගොඩක් දෙනා පාවිච්චි කරන්නෙ හෙයා ජෙල්. ඔයාල හෙයා ජෙල් ගන්නකොට මුලින්ම බලන්න ඒක තමන්ගෙ කොන්ඩෙට ගැලපෙනවද කියල. ඒක කරන්නෙ කොහොමද?

සමහර හෙයාජෙල් වර්ග වඩාත් ගැලපෙන්නෙ ස්ටයිලින් වලට (උදා- ගුඩ් ලුක්) මේවා හොඳින් ඇලවෙන නිසා කොන්ඩෙ හොඳින් ඇලවිලා හිටිනව. ඒත් තවත් සමහර ජෙල් වර්ග ආලේප කලාම කොන්ඩෙ තියෙන්නෙ බුරුල්ව. (උදා- ගැට්ස්බි) තමන්ට කොන්ඩෙ තියාගන්න අවශ්‍ය විධිය ගැන හිතල ජෙල් වර්ගය තෝරගන්න.

අනිත් දේ හෙයාජෙල් ආලේප කරන්න කලින් කොන්ඩෙ හොඳින් තෙත් කරන්න. තුවායක් අරන් හොඳින් පිහදාන්න හැබැයි තෙත ගතිය යන්තම් ඉතුරු කරන්න. එතකොට හෙයාජෙල් ඉතාමත්ම ලේසියෙන් ආලේප කරන්න පුළුවන්. ඒවගේම හෙයාජෙල් ආලේප කරල දවස අවසානයේ අනිවාර්යෙන් ඔළුව හොඳින් පිරිසිදු කරගන්න. හෙයාජෙල් එක්ක නින්දට යන එක නරක පුරුද්දක්. කොන්ඩෙ පැලෙන්න, ඉදෙන්න වගේම ගැලවෙන්න ඉඩතියනව.

තමන්ට අවශ්‍ය සැහැල්ලු ඒත් අවුල්නොවෙන ස්ටයිල් එකක් නම් හෙයාජෙල් වෙනුවට හෙයා මූස් (Hair Mousse) එකක් පාවිච්චි කරල බලන්න. මේක හෙයාස්ප්‍රේ වලට ගොඩක් දුරට සමානයි ඒත් ආලේපයක් විදියට භාවිතා කිරීම ඉතාමත්ම පහසුයි. පාවිච්චි කරන් කලින් බෝතල‍ය හොඳින් සොලවන්න. ගොඩක් වෙලාවට මූස්, ජෙල් වලට වඩා මිලෙන් අධිකයි. ජෙල් වලට වගේ මූස් වලට කොන්ඩෙ තෙත් කිරීම එතරම් අවශ්‍ය නැහැ. කෙලින්ම ආලේප කරන්න පුළුවන්.

මූස් භාවිතයෙන් තදින් එකට ඇළුනු නැති ඒත් හොඳ පෙනුමක් සහිත සැහැල්ලු පෙනුමක් ලබාගන්න පුළුවන්. ඒත් මතක ඇතුව දවස අවසානයේදී කොන්ඩය හොඳින් සෝදගන්න. විශේෂයෙන්ම ෂැම්පු වර්ගයක් භාවිතා කරනවානම් ඉතා පහසුවෙන් සාමාන්‍ය සේදිමකින් නොයන, සමහර මූස් වර්ගවල තියන ඇලෙනසුළු ගතිය කොන්ඩෙන් සම්පූණයෙන්ම යවාගන්න පුළුවන්.

අපි කලින් කතාකරපු ජෙල් සහ මූස් කියන දෙකම භාවිතා කරන්නෙ ඇලෙනසුළු ද්‍රව්‍ය. මේවා භාවිතයෙන් පස්සෙ අනිවාර්යෙන් කොන්ඩය සෝදාගත යුතුයි. ඒත් මීළඟට අපි කතා කරන්න යන්නෙ එහෙම කරන්න අත්‍යවශ්‍ය නොවන ද්‍රව්‍යක් ගැන.

හෙයා වැක්ස් (Hair Wax) කලින් කියපු ජෙල් සහ මූස් වලට වඩා මිලෙන් අධිකයි. ඒත් හිසකෙස්වලට හිතකරයි. වැක්ස් කියන්නෙ ඉටි වගේ ද්‍රව්‍යක්. මේක කොන්ඩෙ ගාන්න ඕනෙ ඉතාමත් සුළු වශයෙන්. වැක්ස් භාවිතයෙන් ස්ටයිල් කරන්න ටිකක් අමාරුයි. ඒත් ඔබේ කොන්ඩයේ අමුතු තෙත් පෙනුම දවසම තියාගන්න මේකෙන් පුළුවන්. ජෙල් හෝ මූස් වලින් සිදුවන කොන්ඩය වියලීම මින් සිදුවන්නේ නැහැ. කොන්ඩයේ තෙල් ආලේප කලා වගේ. B-)

ඒත් වැක්ස් අධික ලෙස භාවිතා කරන්න එපා. ඊළඟට දවස අවසානයේ හිස පිරිසිදු කිරීම අනිවාර්ය නැහැ. ගොඩක් දෙනා ගෙදර යන්නෙ ගොඩක් රෑ වෙලා නිසා රෑට නාන්න කැමති නෑ. මේ වගේ අයට වැක්ස් ගොඩක් ගැලපෙනවා. ඒත් වැක්ස් එක් වරක් භාවිතයෙන් පසුව අනිවාර්යයෙන් හිස පිරිසිදු කිරීම වැදගත්.

ඔය කොයි වර්ගය පාවිච්චි කලත් ඒවා කෙස් ගසේ මුලේ (root) ආලේප නොකල යුතුයි. කෙස් ගස වර්ධනය වීමට එය බාධාවක්. විශේෂයෙන් ජෙල් සහ මූස් කෙස් ගසේ ඉහල කොටසේ පමණක් ආලේප කරන්න.

කොහොම උනත් මේ එක දෙයක් හෝ භාවිතා නොකිරීමට තීරණය කිරීමත් හොඳ දෙයක්. අනං මනං වර්ග නිතරම කොන්ඩෙ ගාන එක එච්චර හොඳ දෙයක් නෙමේ. කෙස් වර්ධනයට ඒක බාධාවක්. සමහරු කිසිම දෙයක් ආලේප නොකිරීමට තීරණය කිරීම මීට හේතුව වෙන්න පුළුවන්. ඒත් ඔබ දැඩි හිරු එළියේ යනවා නම් කුමක් හෝ තෙල් වර්ගයක් ආලේප කිරීම වැදගත්. විටමින් E අඩංගු හෙයා ඔයිල් වර්ග වෙළඳපලේ ඕනි තරම් තියනවා. ජෙල්, මූස් හෝ වැක්ස් පාවිච්චි නොකරනවානම් මේ වගේ තෙල් වර්ගයක් පාවිච්චි කිරීමෙන් දැඩි හිරු එලිය නිසා ඔබේ හිස කෙස් දුර්වර්ණ වීම, හැලී යාම සහ පැලීම අවම කරගන්න පුළුවන්. ~X(

අත් ඔරලෝසු

2010-03-13T01:11:00.001+05:30

කාන්තාවන්ට නානාප්‍රකාර ආයිත්තම් තිබුනත් පිරිමින්ට අඳින්න තියන ආයිත්තම් ප්‍රමාණය ඉතාමත්ම අඩුයි. මේ අතර අත් ඔරලෝසු ඉදිරියෙන් ඉන්නවා. අපි බලමු ඔරලෝසුවක් තෝරනකොට දැනගන්න ඕනි කරුණු මොනවද කියල. :)

ඔරලෝසු ප්‍රධාන වශයෙන් බ්‍රේස්ලට් වර්ගයේ ඔරලෝසු, පටි ආකාරයේ ඔරලෝසු සහ ක්‍රීඩා ඔරලෝසු ලෙස බෙදන්න පුළුවන්.

ඔබට කාර්යාලයට යන්න, විවාහ උත්සවයකට යන්න "බ්‍රේස්ලට් වර්ගයේ ලෝහමය ඔරලෝසු" වඩාත් සුදුසුයි. මේ වර්ගයේ ඔරලෝසු වල මළ නොබැ‍ඳෙන වානේ වලින් හදපු පටි තියනව. ‍ඒ ලෝහමය පෙනුම business ඇඳුමකට හොඳින් ගැලපෙනවා. විශේෂයෙන්ම රිදී පැහැයෙන් යුත් ලෝහමය ඔරලෝසු හොඳ පෙනුමක් ලබා දෙනවා. ලෝහමය පටි සහිත ඔරලෝසු රන් පැහැයෙනුත් ලබාගන්න පුළුවන්. ඒත් රන් පැහැය සෑම ඇඳුමකටම ගැලපෙන්නෙ නැහැ. රන් පැහැයෙන් යුත් ඔරලෝසු විවාහ උත්සව වැනි අවස්ථා වලට වඩාත් සුදුසු යි. කල්පනාකාරීව තෝරගන්න. ලෝහමය ඔරලෝසු දීර්ඝ කාලයක් පාවිච්චි කරන්නත් පුළුවන්. ;)

රන් සහ රීදී පැහැයට අමතර වර්ණ වලට ගලපන්න නම් වඩාත් හරියන්නෙ "පටි සහිත ඔරලෝසු". මේවා විවිධ වර්ණ අනුව ලබාගන්න පුළුවන්. දුඹුරු, කළු, අළු සහ මෙරුන් මේ වර්ණ වලින් සමහරක්. සමහර පටි සහිත ඔරලෝසු වල පටි හදල තියෙන්නෙ සැබෑ සත්ව සම් වලින්. නවීන පෙනුමක් ගන්න ප්ලාස්ටික් පටි සහිත ‍ඔරලෝසු වලට පුළුවන්. B-) සාමාන්‍ය casual ඇඳුමකට පටි ඔරලෝසුවකින් එන්නෙ අමුතුම පෙනුමක්.

ඕනෑම පරිසර තත්වයකට සුදුසු ඔරලෝසු විදියට "ක්‍රීඩා ඔරලෝසු" හඳුන්වන්න පුළුවන්. විරාම ඝටිකා වගේ ක්‍රීඩා සඳහා වන අංග මේ ඔරලෝසුවල තියනවා. ක්‍රීඩා ඔරලෝසු ඇතුලට වතුර යන්නෙ නෑ. (water resistant) ඒ වගේම මේව පැළඳගෙන වතුරෙ කිමිදෙන්න පවා පුළුවන්. ඉතිං ඔබේ ඔරලෝසුව කොච්චර water resistant ද? :-/ ඒක බලන්නේ මෙන්න මෙහෙම. ගොඩක් වෙලාවට ඔරලෝසුව යටපැත්තෙ ATM කියල අගයක් ඇති. මේකෙන් මනින්නෙ කොච්චර water resistant ද කියල.

3 atm (30 m or 100 ft): වැස්ස සහ සුළු ලෙස ජලය
5 atm (50 m or 165 ft): පිහිනීම, වතුරට පැනීම (එහෙත් අධික ලෙස වතුරට පැනීම අහිතකර ය)
10 atm (100 m or 330 ft): පිහිනුම් තටාක වල කිමිදීමට
20 atm හෝ වැඩි ගැඹුරු ස්ථානවල කිමීදීමට

source http://www.chealwatch.com/water.htm

ඔය කොයි ඔරලෝසු වර්ගයක් ගැලපෙන්නෙ ඒ ඒ තැන් වලට විතරයි. උදාහරණයක් විදියට ක්‍රීඩා ඔරලෝසු කාර්යාලයට සුදුසු වෙන්නෙ නෑ. ඒ නිසා ඔබ තෝරගන්න ඔරලෝසුව ඔ‍බේ දෛනික ජීවිතයටත් ගැලපිය යුතුයි.

ඔරලෝසුවේ මුහුණතේ ප්‍රමාණයත් ඉතා වැදගත්. ඔබ තෝරන ඔරලෝසුවේ මුහුණතේ ප්‍රමාණය ඔබේ අතේ ප්‍රමාණයට ගැලපිය යුතුයි. විශාල අතක් ඇති අයකුට කුඩා මුහුණතක් සහිත ඔරලෝසු හරියන්නෙ නැහැ. එතකොට පේන්නෙ කාන්තා ඔරලෝසුවක් වගේ. ඒ වගේම ඔරලෝසු මුහුණත විවිධ හැඩ තල වලිනුත් ලබාගන්න පුළුවන්.

ඊ ළඟට වැදගත්ම දේ ඔරලෝසුව අතට කොච්චර තද වෙන්ව ඕනිද කියන එක. ඔරලෝසුව බුරුලට එල්ලෙන විදියට බඳින්න එපා. පහළ පින්තූරෙ බලන්න. නිවැරදිව ඔරලෝසුව බඳින්නෙ ඔහොම.

ඔරලෝසුව අතට තද වෙලා තියෙන්න ඕනි වගේම අත නිදහසේ නවන්න සහ චලනය කරන්න පුළුවන් වෙන්න ඕනි. කොටින්ම කිව්වොත් එදිනෙදා වැඩ වලදී ‍ඔරලෝසුව වදයක් වෙන්න ඕනි නෑ.

රැවුල බෑම

2010-03-07T19:50:00.003+05:30

මේක ටිකක් මාළු බානව වගේ වැඩක් තමා. හොඳ රැවුල බෑමකට සැලකිය යුතු කාලයක් වැය වෙනවා වගේම ඉවසීමකුත් තියෙන්න ඕනි. විශේෂයෙන්ම උදේට රැවුල බාන වැඩේ ඉවසීමෙන් කරන්න ඕනි. හදිස්සියට කරන්න ගියොත් තුවාල වෙන්න පුළුවං වගේම දවසම ප්ලාස්ටර් ගහගෙන ඉන්නත් වෙයි. :p

උදේ නැගිට්ට ගමන් රැවුල බාන්න එපා. මූණේ හම ටිකක් ඇදෙන්න දෙන්න. එතකං ඔන්න තේ එකක් බොන්න වෙලාව තියනව :) . ඔක්කොටම කලිං, රැවුල ගොඩක් වැවිල නම් කතුරක් අරං ට්‍රිම් කරගන්න පුළුවන්. එතකොට රැවුල බානකොට වේදනාව අඩුයි. මුලින්ම මූණ මඳ උණුවතුරෙන් සෝදගන්න. මඳ උණු වතුර නිසා රැවුල් ගස් කෙලින් වෙනවා. එතකොට රැවුල බාන්න ලේසියි. මූණ උණු වතුරෙන් සේදුවට රේසරය සෝදන්න ඕනි ඇල් හෝ අයිස් වතුරෙන්. එතකොට හොඳට කැපෙනව.

දැන් ශේවිං ක්‍රීම් ගාගන්න. එතකං රේසර් එක අයිස් හෝ ඇල් වතුරේ දාල තියන්න පුළුවන්. ශේවිං ක්‍රීම් වෙනුවට සබන් පාවිච්චි කරන්න එපා. සබන් නිසා රේසරය කැපෙනගතිය අඩි වෙනවා. මේ නිසා රැවුල බෑවට පස්සෙ මූණ දනව වගේ දැනෙයි. ශේවිං ක්‍රීම් ගොඩක් පාවිච්චි කරන්නත් එපා. සාමාන්‍ය ගානට ගාගන්න. ශේවිං ක්‍රීම් හෝ ෆෝම් මුහුණේ උඩු අතට ගාගන්න.

රැවුල බාන්න හොඳ රේසරයක් තෝරා ගැනීමත් ඉතා වැදගත්. ඔය ලාබෙට තියන රේසර් වර්ග වල සමහර වෙලාවට තියෙන්නෙ බ්ලේඩ් තල එකයි. දෙකක් තිබුනත් ඒවයෙ නියම ප්‍රමිති නැත්නං තුවාල වෙන්න පුළුවං. ගොඩක් වෙලාවට එහෙම රේසර් පාවිච්චි කරන්න පුළුවන් දෙතුන් වතාවක් තමා. තල මාරු කරන්න පුළුවන් රේසර් තෝරගන්න. මේව ටිකක් ගනං උනාට ගොඩක් කල් පාවිච්චි කරන්න පුළුවං. ඒ වගේම ඒවයේ බ්ලේඩ් තලය තියන කොටස ඉතාමත්ම නම්‍යශීලියි. මේ නිසා විශේෂයෙන්ම ගෙල ප්‍රදේශයේ රැවුල ඉතාමත්ම ලේසියෙන් බාගන්න පුළුවන්.

රැවුල බානකොට කම්මුල් ප්‍රදේශයෙන් ආරම්භ කරන්න. ඉහල සිට පහලට, දිගට, රේසරේ ඇදගෙන යන්න. පහල සිට ඉහලට අදින එක ඒතරම්ම හොඳ වැඩක් නෙමේ. මූණ සීරෙන්න පුළුවන්. ‍නිතරම රැවුල බානකොට හම ඇදිල තියෙන්න ඕනි. මූණ දෙපැත්තට හරවනකොට මතක ඇතුව මූණ ඇල කරන්න එපා. එහෙම කලොත් කන් දෙක ළඟ කො‍න්ඩෙ ඉවර වෙන තැන කපනකොට ඇදවෙයි :( . රේසරේ වැඩිය තද කරන්න එපා. නිතරම හොඳ මුවහත් තලයක්ම පාවිච්චි කරන්න. රැවුල බාන අතරමග රේසරය විටින්විට මඳ උණුවතුරට දාන්න. එතකොට අර ශේවිං ක්‍රීම් සේදිලා යනව. කපන්න කලින් ආයෙත් අයිස් හෝ ඇල් වතුරට දාන්න.

ඊ ළඟට නාසයට පහල රැවුල බාගන්න. එවගේම ගෙල සහ නිකට ආසන්න ප්‍රදේශය. විශේෂයෙන්ම නිකට ප්‍රදේශය සඳහා කෙටි කැපුම් භාවිතා කරන්න. සම්පූර්ණ මුහුණේම රැවුල බාල අවසන් වුනාම මුහුණ හොඳින් සෝදන්න. දැන් බලන්න මූණේ මඟ ඇරුනු තැන්. ඒ තැන් ආයෙමත් රේසරෙන් බාගන්න වෙනව. සියල්ල අවසන් වුනාම මුහුණ සීතල වතුරෙන් හොඳින් සෝදගන්න. සීතල වතුර නිසා මූණේ සීරුණු තැන් වලට සහනයක් දැනෙයි. මීළඟට ‍after shave ‍ස්වල්පයක් මුහුණේ ආලේප කරන්න පුළුවන්. නැත්නම් මොයිස්චරයිසර් වර්ගයක් පාවිච්චි කරන්නත් පුළුවන් :) .

ඇඳුම් තෝරන විට... (casual wear)

2010-03-06T23:14:00.006+05:30

මම අද කියන්න යන්නෙ කැෂුවල් ඇඳුම් තෝරන විට මොන වගේ ඇඳුම්ද තෝරගන්න ඕනි කියල. පිරිමි කැෂුවල් ඇඳුම් ප්‍රධාන වශයෙන් ටී ෂර්ට් හෝ ෂර්ට් සහ කලිසම් හෝ ඩෙනිම් කලිසම් ලෙස බෙදන්න පුළුවන්.

මේ හැම එකකදීම පාට තුනකට වඩා යන්න එපා. එහෙම ගියොත් අච්චාරුවක් වෙයි. ඇඳු‍මේ වටිනාකම පේන විදියට ඇඳුම් ගලපන්න. ඒ වගේම හැම ඇඳුමක්ම තමන්ගෙ ඇ‍ඟේ ප්‍රමාණයට ගැලපෙන විදියට තෝරගන්න.

ඇ‍ඟේ ප්‍රමාණයට වඩා විශාල ටීෂර්ට් සහ ෂර්ට් ඔබේ ඇ‍ඟේ හැඩය හංගනවා. බැගි ෂර්ට් ඇන්දෙ 90 ගණන් වල දැන් ඒව එච්චර ගනන් ගන්නෙ නෑ. ඔබ කෙට්ටු නම් ඒ ගැන වද වෙන්න එපා. හැමෝම ලස්සනයි. ලොකු ඇඳුම් ඇන්ද කියල‍ ඔබ ලොකුවට පේන්නෙ නෑ. එහෙමයි කියල කිටි කිටියට හිර ඇඳුම් ගන්නත් එපා. ටී ෂර්ට් හෝ ෂර්ට් වල, කර ළඟින් ගානට හරි ගිය තරමින් ඉතිරි ටික නිකන්ම හරියන්නෙ නෑ. එක එක අයගෙ ශරීරයේ හැඩ පරිමාණ වෙනස් සමහරුන්ගෙ උරෙස් පළල් ඒත් ඉණ ටිකක් පොඩියි. තවත් සමහරුන්ගෙ බෙල්ල මහතයි. ඒ නිසා හැම තැනින්ම ගානට හරියන ඇඳුම් විතරක් තෝරගන්න.

නිතරම ටී ෂර්ට් සහ ෂර්ට් තෝරන විට උරහිස සහ අත අසල මැස්ම නිවැරද තැන තියනවද බලන්න. එම මැස්ම තියෙන්නෙ උරහිසෙන් ඉහල හෝ පහල නම් ඒ ඇඳුම ගැලපෙන්නෙ නැහැ.

ඔබේ උස අනුව ටී ෂර්ට් හෝ ෂර්ට් වල උස තෝරගන්න. විශේෂයෙන්ම ඕනෑවට වඩා උස ටී ෂර්ට් ඇන්දම ඒව නිතරම පිටිපස්සෙ පැටලෙනවා. මේක ටිකක් කරදරයක්. ටී ෂර්ට් එකේ උස, බෙල්ට් එකට ටිකක් පහලට වඩා යටට ගන්න එපා.

කලිසම් තෝරනකොට නිතරම ඉණ මනින්න. කලින් ලිපියක මම කිව්වා ඉණ හරියටම තියෙන්නෙ කොතනද කියල. ඔබ ගන්නෙ ඩෙනිමක් නම් හරිගානට වඩා ටිකක් වැඩියෙන් ගත්තට කමක් නෑ. ගොඩක් ඩෙනිම් හෝදනකොට ටිකක් විතර පුංචි වෙනවා. ඉණ හරියටම තද කරගන්න බෙල්ට් එකක් පාවිච්චි කරන්න.

ඩෙනිම් ගැන තව ගොඩක් දේවල් මම ඉස්සරහටම කියන්නම්. දැනට මෙන්න මේ ටික මතක තියාගන්න. ඩෙනිමේ පිටිපස්ස ඕනෑවට වඩා බැගී තියන ඒව ගන්න එපා. ඒව ඇන්දම ඇ‍ඟේ හරි හැඩය එන්නෙ නෑ. ‍එහෙමයි කියල ඕනවට වඩා කිටි කිටියට හිර ඒව ගන්නත් එපා. අනාගතේ ආරක්ෂා කරගන්න.

බැගී ‍‍‍ඩෙනිම් :(

ඒ වගේම කලිසම් වල උස ඉතා වැදගත්. ඩෙනිම් වල උස තෝරනකොට පහලින් ටිකක් රැළි තිබනට කමක් නෑ. ඒත් කලිසම් වල එහෙම රැළි තිබීම අවලස්සනයි. සපත්තුවේ අඩිය අසල තමා කලිසමේ උස තිබිය යුත්තේ. තවත් දෙයක් කලිසම් වල කකුල දිග නම් නවන්න එපා. ටේලර් කෙනෙකුට කීයක් හරි දීල කකුල අඩු කරල මහගන්න.

හොඳ ගැලපුමක් :)

ඕනෑවට වඩා වැඩි වැඩ දාන්න යන්නත් එපා. උදා- යකඩ දම්වැල් සහිත ඩෙනිම් කලිසම + දිලිසෙන ප්‍රින්ට් සහිත ටී ෂර්ට් එක. අපේ අය ගොඩදෙනෙක් කරගන්න වැරැද්දක් මේක. චාම් ඒත් පෙනුමක් එන විදියට ඇඳුම් තෝරගන්න. දීප්තිමත් වර්ණ වලට යන්න. සියල්ල ලා පාට හෝ සියල්ල තද පාට වලින් තේරීමෙන් වලකින්න.

ඇඳුම් වල වර්ණ ගැලපීම ඉතාමත් වැදගත්. පාට තුනකට වඩා යන්න එපා කියල මං කලිනුත් කිව්වනෙ. ඔබ තේරුවෙ ඩෙනිමක් නම් තනිපාටක ප්‍රින්ටඩ් ටී ෂර්ට් එකක් හොඳින් ගැපපෙනව. උදා-නිල්පාට ඩෙනිම + සුදු පාට ටී එක. ලා පාට සහ තද පාටවල් එකිනෙක ගලපන්න. ඩෙනිම් කලිසමේ වැඩිය මෝස්තර නැත්නම් මෝස්තර වැඩිය තියන ෂර්ට් එකක් හෝ ටී ෂර්ට් එකක් තෝරගන්න.

අවසාන වශයෙන් හොඳ සපත්තු කුට්ටමක් සහ බෙල්ට් එකක් භාවිතා කරන්න. දැං කාලෙ සැන්ඩල්ස් දෙකක් ගන්නවට වඩා සපත්තු දෙකක් ගන්න එක ලාබයි.

කකුල් සහ සපත්තු දුර්ගන්ධය

2010-03-04T00:52:00.006+05:30

ඇඳුම් සහ තමන්ගෙ රූපය ගැන විතරක් නෙමේ සෞඛ්‍ය ගැනත් ලිපියක් ලියන්න හිතුවා. මේ ලියන්නෙ (ඇත්තටම ටයිප් කරන්නෙ) කකුල් සෞඛ්‍ය ගැන.

තමන්ගෙ සපත්තු සහ කකුල් වලින් හමන දුර්ගන්ධය තමන්ට ප්‍රශ්ණයක් විදියට නොපෙනුනාට අනෙක අයට හරිම බැරෑරුම් ප්‍රශ්ණයක් වෙන්න පුළුවන්. මේ හේතුව නිසා සමාජය ඉදිරියේ සමහරු නොයෙක් අවස්ථාවලදී ලැජ්ජාවට පත්වෙනවා. සමහර විට ඔබට නොදැනුනාට ඔබේ සපත්තුවේ දුර්ගන්ධය අනෙක් අයට භයානක විදියට දැනෙනවා. සමහරුන‍්ගෙ සපත්තු වලින් එන්නෙ මිනී කුණු ගඳ :p

ඉතිං ඇයි මෙහෙම වෙන්නෙ? අපේ කකුල් වලින් අධික ලෙස දහඩිය පිට වෙනවා. සාමාන්‍යයෙන් කකුල් දෙකෙන් දවසකට පයින්ට් එකක විතර දහඩිය පිට වෙන්න පුලුවන් ලු. :o නමුත් මෙහෙම දුර්ගන්ධය හමන්නෙ ඒ දහඩිය නිසා නෙමේ. ඒ මත පදිංචි වෙලා ඉන්න බැක්ටීරියා නිසා. අපේ හම මත ඉන්න බැක්ටීරියා අපේ හමේ මැරුණු සෛල ආහාරට ගන්නවා. සපත්තුව ඇතුලෙ තියන කලුවර , ආර්ද්‍රතාවයෙන් වැඩි පරිසරය බැක්ටීරියා වලට තවත් උදව් කරනවා.

ගඳ ගහන කකුල් වලට මොකද කරන්නෙ? පළවෙනි දේ හොඳින් සෝදන්න. නිකං වතුර දාල හෝදල හරියන්නෙ නෑ. දවස් දෙක තුනකට වතාවක්වත් මෙහෙම කරන්න. වතුර එකක් සාමාන්‍ය ගානට රත් කරල ඒකට ෂැම්පු ටිකක් දාගන්න. ෂැම්පු වෙනුවට තේකොළ හැඳි 2-3ක් පාවිච්චි කරන්න පුළුවන් නම් වඩාත් හොඳයි. තේ වල තියන ටැනික් අම්ලයට බැක්ටීරියා වර්ධනය ගොඩක් දුරට නවත්තන්න පුලුවං. ඒත් ඉතිං තේ කකුල් වලට දාන්න ලෝබයි වගේ නං ෂැම්පු ටිකක් පාවිච්චි කලාට අවුලක් නෑ. ;)

දැන් වතුර එක නිවෙන්න කලින් කකුල් දෙක උණු වතුර එකේ දාගෙන ඉන්න. කකුල් හොඳින් අතුල්ලල සෝදන්න. විශේෂයෙන්ම ඇඟිලි අතර ප්‍රදේශය හොඳින් සෝදන්න. කකුල Pumice Stone එකකින් අතුල්ලන්න පුළුවන් නම් හොඳයි. මේකෙන් අර මැරුණු සම් කොටස් ඉවත් වෙනවා. එතකොට ඒව සපත්තුව ඇතුලෙ රැ‍ඳෙන්නෙ නෑ. Pumice Stone සාමාන්‍යයෙන් සුළු ගානකට මිළදීගන්න පුළුවන්. හැබැයි Pumice Stone එකෙන් තදින් අතුල්ලන්න නම් එපා. කකුලක් කඩෙන් ගෙන්න වෙයි. :p බුරුසුවකින් ඇතිල්ලුවත් මැරුණු සම් කෑලි ගොඩක් දුරට ගැලවිලා හේදිලා යනව.

Pumice Stone

කකුල් වල පිරිසිදුකම ආරක්ෂා නොකලොත් විවිධ ආකාරයේ පුස් වර්ග, විශේෂයෙන්ම ඇඟිලි අතර ඇතිවෙන්න පුළුවන්. මේව ඉතා වේදනාකාරියි වගේම සුව කරන්න හරිම ආමාරුයි. හරි ප්‍රතිකාර
නොකලොත් තත්වය ගොඩක් බරපතල වෙන්න පුළුවන්.

නිතරම කපු හෝ කපු මිශ්‍ර ඝනකම් මේස් පාවිචි කරන්න. හැබැයි business shoes වලට නම් ඝනකම් මේස් දාන්න අමාරු ඇති. එහෙම නම් සාමාන්‍ය ඝනකම තියන කපු මේස් පාවිච්චි කරන්න. නයිලෝන් මේස් වලට දහඩිය උරාගන්නෙ නැති නිසා දාඩිය, කකුල වටා තැන්පත් වෙනවා. බැක්ටීරියා වලට මේක හොඳ අවස්ථාවක්. ඒ නිසා මොන වෙලාවකවත් නයිලෝන් මේස් පාවිච්චි කරන්න එපා. ඒ වගේම එකම මේස් එක දවසකට වඩා පාවිචිච් කරන්න එපා. දවසට එක මේස් කුට්ටම ගානෙ තියාගන්න. මේස් නැතුව සපත්තු දාන්නම එපා.

සපත්තු මිළදී ගන්නකොට කකුලට හොඳින් හුස්ම ගන්න පුළුවන් සපත්තු තෝරගන්න. සපත්තු කුට්ටම් කීපයක් තියාගන්න. එකක් පාවිච්චි කරල ඊ ළඟ දවසෙ වෙනින් එකක් දාන්න. කලින් දවසෙ සපත්තු දෙක හොඳින් විවෘතව වේලෙන්න දෙන්න. විශේෂයෙන් වැසි දවස්වල සපත්තු තෙමුනම අපේ අය තෙත පිටින්ම දාගෙන යනව. ඒක කොහෙත්ම හොඳ නැති දෙයක්. සපත්තු නිතරම වියලිව තියා ගන්න. ෆාමසියෙ තියනව athlete foot powder කියල ජාතියක්. මේවයෙ ගොඩක් වෙලාවට තියෙන්නෙ ටැල්කම් පවුඩර්. මේව සපත්තු දාන්න කලින් කකුලට විශේෂයෙන් කකුලෙ ඇඟිලි අතරට දාන්න. මේ මගින් ඇඟිලි අතර වියලිව තබාගන්න පුළුවන්. මතක ඇතුව ඊ ළඟ දවසෙ පවුඩර් දානකොට කලින් දවසෙ පවුඩර් සපත්තුවෙන් අයින් කරන්න.

බස්එකේ, ඔෆිස් එකේ නිකං ඉන්න වෙලාවට, අනික් හැම පුළුවන් වෙලාවකම සපත්තු ගලවන්න. කකුල්වල දාඩිය වේලෙන්න දෙන්න. ලේස් නැති සපත්තු තෝරගත්තොත් මේ වැඩේ හරිම ලේසියි. මේ දේවල් පිළිපැද්දොත් ලැජ්ජාවක් බයක් නැතුව පොදු ස්ථානයක සපත්තු ගලවන්න ඔයාලට පුළුවන් වේවි.

කොන්ඩා කැපීම

2010-03-03T00:50:00.004+05:30

අද අපි බලමු කොහොමද හොඳ කොන්ඩ මෝස්තරයක් කපාගන්නෙ කියල. හොඳ කොන්ඩ මෝස්තරයකට නම් හොඳ ශිල්පියෙකුත් අවශ්‍යයි. මුලින්ම හොඳ සැලොන් එකක් තෝරගන්න. ඔය නම ගිය සැලොන්වල ගාන සැර උනාට වැඩත් ඇත්තටම ගොඩක් හොඳයි. සැලොන් එකක් තෝරනකොට පිරිමින්ගේ කොන්ඩ කැපීම සඳහාම වෙන්වුනු සැලොන් එකක් තෝර ගන්න. උදා: වජිර සැලොන්- බම්බලපිටිය (මෙය මුදල් නොගෙවා ප්‍රචාරය කරන ලද දැන්වීමකි :) ) ඒකට හේතුව කාන්තාවන්ගෙ කොන්ඩ මෝස්තර දාන අයට වඩා වඩාත් හොඳ පෞරුෂයක් තියන විදියට මේ අය කොන්ඩය කපන නිසා. යාළුවො කොන්ඩෙ කපන්නෙ කොහෙන්ද කියල එයාලගෙන් අහල දැනගන්න. එයාලගෙ කොන්ඩය හොඳින් කපලද කියල නිරීක්ෂනය කරන්න. ටවුමෙ හොඳයි කියල හිතෙන සැලොන් එකකට ගිහින් එකපාරක්වත් ට්‍රයි කරල බලන්න. හැබැයි එක පාරක් හරි හරියට කැපුවෙ නැත්තං ආයෙ පැත්ත පලාතකවත් යන්න නං එපා. :p

සමහර සැලොන්වල ඕනිනම් appointment එකක් දාගන්න පුළුවන්. එහෙම කරන්න පුළුවන් නම් කොන්ඩ මෝස්තර ශිල්පියාට නිදහසේ වෙලාව අරගෙන ඔබේ කොන්ඩ මෝස්තරය කපන්න පුලුවං. හොඳ පෙනුමකට මේක ඉතා වැදගත්. හැබැයි ඔයා එතෙන්ට කල් වේලා ඇතුව යන්න. :p

උඩ තියන පින්තූරෙ බලන්න. පළවෙනි පින්තූර දෙකේ කොන්ඩය කපල තියන විදිය අපිලිවෙලයි. පළවෙනි එකේ කොන්ඩෙ කපල තියෙන්නෙ තැනින් තැන. දෙවනි එකේ කොන්ඩය අවසාන වෙන තැන (border) අපැහැදිලියි. ඒත් තුන්වෙනි එකේ වෙන්වෙන තැන් හරිම පැහැදිලියි වගේම එකම විදියට කපල තියනව. මීට අමතරව කොන්ඩය කැපුවම බලන්න, අනවශ්‍ය විදියට කෙස් ගස් උඩට පැනල තියනවද කියල. එහෙම පැනල තියනව කියන්නෙ ශිල්පියාගෙ තියන අදක්ෂකම තමා.

ඊ ළඟ දේ තමා පිටිපස්සෙන් හරහට කපනවද නැද්ද කියන එක. මම නං කියන්නෙ හරහට කපන්න එපා කියල. බලන්න මේ පිංතූරෙ

මේ තියෙන්නෙ හරහට කපපු සහ නැති කොන්ඩ දෙකක්. වම් පැත්තෙ තියෙන්නෙ කපපු අළුත පේන හැටි. දකුණුපැත්තෙ තියෙන්නෙ දවස් කීපයක් ගියාම පේන හැටි. බලන්න හරහට කපපු කොන්ඩෙ (blocked) තියන අපිලිවෙල. ඒත් හරහට කපපු නැති කොන්ඩෙ (tapered) ලස්සනට පිලිවෙලට තියනව.

තමන්ට ඕනි මෝස්තරය ගැන ශිල්පියාට හොඳින් කියල දෙන්න. කොන්ඩ මෝස්තර ශිල්පියා සමඟ හොඳින් සුහද වෙන්න. ලැජ්ජ වෙන්න එපා. තමන් කැමති මෝස්තරය ඕනි නං පින්තූරෙකින් පෙන්වන්න පුලුවං. හැබැයි මතක තියාගන්න කොන්ඩ මෝස්තරයක් තෝරගන්න ඕනි තමන්ගෙ මූණේ හැඩේට ගැලපෙන විදියට. මම මේ ගැන පස්සෙ පැහැදිලි කරන්නම්.

හැම මුහුණකටම හැම මෝස්තරයක්ම ගැලපෙන්නෙ නෑ වගේම හැම කොන්ඩෙකින්ම හැම මෝස්තරයක්ම කපන්නත් බෑ. සමහර මෝස්තර ඔබේ කෙස්ගස්වලින් කරන්න බැරිවෙන්න පුලුවං. ඔබේ කොන්ඩයට හෝ ඔබේ මුහුණට ඔබ තෝරපු මෝස්තරය ගැලපෙන්නෙ නැත්නං ‍කොන්ඩ මෝස්තර ශිල්පියා ඔබට උදව් කරයි. (එයාට සල්ලි දෙන්නෙ ඕවටත් එක්ක තමා) ඔහු කියන දේටත් ඇහුම්කන් දෙන්න.

ඔබට ඇති කාර්යබහුලත්වයත් සමඟ තේරිය යුතු කොන්ඩ මෝස්තරය වෙනස් විය යුතුයි. උදේට ලෑස්තිවෙනකොට පැයගානක් කොන්ඩෙ හදන්න වෙන්කරන එක සමහර විට කාලය අපතේ යාමක්. ඒවගේම නිතරම කොන්ඩෙට සාත්තු කරන්න අවශ්‍ය නම් ඒකත් සමහර විට කරදරයක් වෙන්න ඉඩ තියනව.

පුළුවන් නම් කොන්ඩ මෝස්තරය කාලෙන් කාලෙට වෙනස් කරන්න. ඔබේ මේ පුංචි වෙනස යාළුවො විතරක් නෙමේ හැමෝම (ගර්ල්ෆ්‍රෙන්ඩ් ඇතුළුව) ලොකු වෙනසක් විදියට දකියි.

කලිසමට බෙල්ට් එකක්

2010-03-02T22:30:00.006+05:30

කලිසමක් අඳිනවනම් අනිවා බෙල්ට් එකකුත් ඕනි වෙනවා. නැත්තං ඉතිං හැලෙනවනෙ. :D මං කියල දෙන්න යන්නෙ හරි ක්‍රමේට බෙල්ට් එකක් තෝරගන්න හැටි.

ඔය නෝලිමිට්, ෆැෂන්බග් වගේ තැන්වල විතරක් නෙමේ පිටකොටුවෙත් බෙල්ට් තියනව පේමන්ට් එකේ. ඒත් මේව කෝකත් ගන්නකොට පරිස්සමෙන්. සමහර බෙල්ට් හදල තියෙන්නෙ යකඩ වලින් ඉතිං ඉණ කියන්නෙ නිතරම දහඩිය දාන ප්‍රදේශයක් නිසා මේ යකට බෙල්ට් ඉක්මනටම නාස්ති වෙනවා. ඒ විතරක් නෙමේ බෙල්ට් එකේ මලකඩ කලිසමෙත් ගෑවෙන්න පුලුවං.

ඔබ අඳින්නෙ කොට කලිසමක් නම් සැහැල්ලු, පළලින් අඩු බෙල්ට් එකක් තෝරගන්න. ඔබ අඳින්නෙ ඩෙනිම් කලිසමක් නම් පළලින් වැඩි සමහර විට ඔබ කැමති නම් බකල් එක ටිකක් විතර විශාල බෙල්ට් එකක් තෝරගන්න පුලුවං. ඒත් සාමාන්‍ය කාර්යාල හෝ වෙනත් වැදගත් ඇඳුම් සඳහා සාමාන්‍ය පළල සහිත බකල් එකේ ඒතරම් වැඩකෑලි නැති එකක් තෝරගන්න තරමට හොඳයි. විශේෂයෙන්ම කාර්යාල ඇදුම් සඳහා දිලිසෙන බෙල්ට් පැළඳීමෙන් ඔබේ පෙනුමට අමුතු sexy ගතියක් එක බව කිව යුතුයි. :p. එවගේම මේ බකල් වල හැඩය පවා වැදගත්. මම නම් කියන්නෙ හතරැස් හැඩයෙන් යුත් බකල් සහිත බෙල්ට් වඩාත් පෙනුමක් තියනව.

ඊ ළඟ ප්‍රශ්නය බෙල්ට් එකේ දිග. මුලින්ම ඔබේ ඉනේ ප්‍රමාණය මැනගන්න. එක එක අය කලිසං අඳින්නෙ එක එක තැන් වලට. සමහරු ඉණට, සමහරු බඩට. තවත් සමහරු ඉනෙන් පහලට. සාමානයෙන් කලිසම ඇඳිය යුත්තෙ ඔබේ පෙකනියේ සිට ඇඟිලි 3ක පළළ විතර පහලට මැන්නම තියන ප්‍රදේශයට. අපැහැදිලි නම් පහළ පින්තූරෙ බලන්න. මිනුම් පටියෙන් මැනල තියෙන්නෙ ඉණ. ඉතිං සමහරුන්ට මේක වෙනස් වෙන්න පුලුවං. කලිසම් ගැන කතා කරනකොට මං මේ ගැන තවත් කියන්නම්.

ඉතිං දැං ඉණේ ප්‍රමාණය මැන්නනෙ. බෙල්ට් එකේ දිග, ඉණේ ප්‍රමාණයට තවත් අඟලක් එකතු කලාම කියන ප්‍රමාණයයි වෙන්නෙ. කෝකටත් බෙල්ට් එක පන්ච් කරන්න කලින් මේක හරියටම මැනගන්න. බෙල්ට් පන්ච් කරනකොට එක එක උල් වලින් අනින්න එපා. ඒ සඳහා විශේෂ අඩුවක්ම පාවිච්චි කරන්න.

ඊ ළඟට වර්ණය. නිතරම සපත්තුවේ වර්ණයට බෙල්ට් එකේ වර්ණය ගලපන්න. උදා. සපත්තුවේ වර්ණය දුඹුරු නම් බෙල්ට් එකත් දුඹුරු. එවගේමයි මං කලින් කිව්වනෙ දිලිසෙන බෙල්ට් කාර්යාලයට වඩාත් සුදුසුයි කියල. එහෙම කිව්වෙ දිලිසෙන සපත්තු වලට වඩාත් ගැලපෙන්නෙ දිලිසෙන බෙල්ට් වීම නිසා.

අවසාන වශයෙන් කලිසම ඇඳල ගෙදර ආවම බෙල්ට් එක ගලවල පැත්තකින් එල්ලල තියන්න. බෙල්ට් රෝල් කරන්න එපා. එහෙම කලාම මැහුම් ගැලවෙනවා. ඒ වගේම මෙන්න මේ ටිකත් මතක තියාගන්න. ගොඩක් විශාල බකල් සහිත බෙල්ට් අඳින්න එපා ඒව හරියන්නෙ කව් බෝයිස්ලට. ඒ වගේම බෙල්ට් නැතුව ෂර්ට් යටකරල කලිසම් අඳින්නම එපා. එහෙම ඇන්දම හරි කැතයි :(. බෙල්ට් එකක් නැත්තං ෂර්ට් එක යට නොකර උඩින් දාල යන්න.

ආයුබෝවන් !

2010-03-02T22:30:00.000+05:30

ඔන්න අළුත් වැඩක් පටන්ගන්නයි හදන්නෙ. කොල්ලන්ට ෆැෂන්.. කෙල්ලො විතරද ලස්සනට අඳින්න පලඳින්න කැමති? අපේ කොල්ලොත් කැමතියි. ඉතිං හැන්ඩියට අඳින්න පළඳින්න කැමති අපේ කොල්ලො වෙනුවෙන් අළුත් බ්ලොග් එකක් කරන්නයි හදන්නෙ.